Ўзбекистонда илмий лабораториялар учун сунъий интеллектга асосланган ягона платформа ишга туширилади
Янги тизим илмий инфратузилмаларни марказлашган ҳолда бошқариш ва тадқиқотлар самарадорлигини оширишга хизмат қилиши айтилмоқда.
Ўзбекистонда илмий лабораторияларнинг сунъий интеллектга асосланган ягона илмий платформасини жорий этиш режалаштирилмоқда. Инновацион ривожланиш агентлиги томонидан ишлаб чиқилаётган ушбу лойиҳа мамлакатдаги барча илмий-тадқиқот инфратузилмалари ҳақидаги маълумотларни ягона марказлашган ахборот ресурсида жамлаш имконини беради.
Платформа орқали илм-фан ва инновацион фаолият билан шуғулланувчи ташкилотларда мавжуд илмий инфратузилмалардан фойдаланиш самарадорлиги таҳлил қилинади, прогнозланади ва оптималлаштирилади. Бу жараёнларда сунъий интеллект технологияларидан фойдаланилиши натижасида вақт ва молиявий ресурсларни тежашга эришилиши кутилмоқда.
Мутахассислар фикрича, мазкур платформа илмий изланишлар сифатини ошириш, такрорий харажатларни камайтириш ҳамда республиканинг турли ҳудудларида жойлашган илмий лабораториялар имкониятларидан тўлиқ ва мақсадли фойдаланишга хизмат қилади. Шу билан бирга, тизим илм-фан соҳасида очиқлик, шаффофлик ва ҳамкорлик алоқаларини янада кучайтиради.
Сунъий интеллект технологиялари асосида яратилаётган ушбу платформа Ўзбекистонда илм-фаннинг рақамли келажагини шакллантириш йўлидаги муҳим қадамлардан бири сифатида баҳоланмоқда. Лойиҳани жорий йилнинг декабрь ойида ишга тушириш режалаштирилган.
