Тошкентда ЙПХ инспекторини автомобиль уриб кетди
Йўл-транспорт ҳодисаси натижасида жабрланган инспекторга воқеа жойида шифокорлар томонидан биринчи тиббий ёрдам кўрсатилган.
Тошкент шаҳрининг Мирзо Улуғбек туманида йўл-патруль хизмати (ЙПХ) инспекторини хизмат вақтида автомобиль уриб юборилиши оқибатида тан жароҳати олган. Ҳолат ҳақида пойтахт Йўл ҳаракати хавфсизлиги бош бошқармаси маълумот берди.
Маълум қилинишича, воқеа 22 январь куни соат 17:30 лар атрофида Шаҳрисабз ва Мустақиллик шоҳ кўчалари кесишмасида содир бўлган. 26 ёшли A.X. бошқарувидаги “Lacetti” русумли автомобиль кескин чапга бурилиши давомида чорраҳа марказида хизмат олиб бораётган ЙПХ инспекторини уриб юборган.
Йўл-транспорт ҳодисаси натижасида жабрланган инспекторга воқеа жойида шифокорлар томонидан биринчи тиббий ёрдам кўрсатилган. Унинг аҳволи бўйича қўшимча маълумот берилмади.
Ҳозирда мазкур ҳолат юзасидан Тошкент шаҳар ИИББ Йўл ҳаракати хавфсизлиги бошқармаси томонидан терговга қадар суриштирув ишлари олиб борилмоқда. Ҳодисанинг барча тафсилотлари аниқланмоқда.
