Ажратилган маблағлар камбағаллик ва ишсизликни 2 баробар қисқартириши шарт — Президент

 

Президент Шавкат Мирзиёев раислигида камбағалликни қисқартириш ва аҳоли бандлигини таъминлаш масалаларига бағишланган видеоселектор йиғилиши бўлиб ўтмоқда.

 

Йиғилишда давлат раҳбари ажратилаётган маблағлар инфратузилмани яхшилаш орқали камбағаллик ва ишсизликни камида икки баробар қисқартиришга хизмат қилиши шартлигини қатъий таъкидлади. Президент туман ҳокимлари аҳолига очиқ мурожаат қилиб, маҳаллама-маҳалла юриб, нечта фуқарони иш билан таъминлаши ва қанча оилани камбағалликдан чиқаришини аниқ тушунтириб бериши зарурлигини қайд этди.

 

— Шунча маблағ ажратилгач, туман ҳокими халқ олдида масъулият олиб, натижа учун жавоб берсин. Ҳокимлик фаолиятига халқнинг ўзи баҳо берсин, — деди Президент.

 

Шунингдек, ҳудудларни саноат, қишлоқ хўжалиги ва сервис соҳаларидаги “солиштирма устунлик”дан келиб чиқиб ривожлантириш зарурлиги кўрсатиб ўтилди. Бу ёндашув Фурқат ва Деҳқонобод туманлари мисолида тушунтирилди.

 

Иқтисодиёт ва молия вазирлиги ҳамда Камбағалликни қисқартириш ва бандлик вазирлигига 70 та туман ва мингта «оғир» маҳалланинг салоҳиятини таҳлил қилиб, иш ўринлари ва даромадни оширишга қаратилган инфратузилма лойиҳалари бўйича алоҳида дастур ишлаб чиқиш ва молиялаштиришни бошлаш топширилди.

 

Бундан ташқари, ҳар бир туманда 5–10 та маҳаллани боғлайдиган 1–2 гектарли саноат зоналари ва кластерлар ташкил этилиб, жами 100 минг нафар аҳоли учун янги иш ўринлари яратиш режалаштирилди.