Энг яхши натижа кўрсатган «оғир» маҳаллаларга 1 миллиард сўмдан маблағ ажратилади
Президент иш ўрни ва даромадни ошириш бўйича самарали ишлаган 100 та маҳаллани молиявий рағбатлантириш бўйича топшириқ берди.
Ўзбекистонда иш ўринлари ва аҳоли даромадини кўпайтиришда энг яхши натижа кўрсатган 100 та «оғир» маҳаллага 1 миллиард сўмдан маблағ берилади. Бу ҳақда Президент раислигида 23 январь куни бўлиб ўтган йиғилишда маълум қилинди. Таъкидланишича, ушбу чора маҳаллалардаги иқтисодий фаолликни янада кучайтиришга қаратилган.
Йиғилишда ҳоким ёрдамчиларини “лойиҳавий ёндашув” асосида ишлашга ўқитиш тизимини жорий этиш топширилди. Бу жараён аввало «оғир» маҳаллалардан бошланади. Ҳар бир туман кесимида аниқ лойиҳалар портфели шакллантирилиб, маҳаллаларда микро ва кичик бизнес ташаббусларини амалга оширишга устувор аҳамият берилади.
Шунингдек, «оғир» маҳаллалардаги бўш ерлар ва давлат объектларининг бошланғич нархини 2–3 баробарга пасайтириб, уларни сотувга чиқариш белгиланди. Энг фаол 100 та маҳалладаги ҳоким ёрдамчилари эса Хитой, Туркия, Корея ва Малайзия каби давлатларга бир ойлик малака ошириш курсларига юборилади.
Президент ҳоким ёрдамчилари сўнгги пайтда ташаббускорларни топиш ва маҳаллаларда лойиҳаларни амалга ошириш бўйича етарли тажриба тўплаганини қайд этди. Эндиликда улар ўз фаолиятини тўлиқ “лойиҳавий ёндашув” асосида олиб боради. Шунингдек, пойтахтда синовдан ўтган “Маҳалла еттилиги” тажрибаси барча туман ва шаҳарларда жорий этилади, маҳалла тизимидаги асосий лавозимлар туман ҳокими томонидан тайинланиши ва озод этилиши белгиланди.
