0
Фарғона водийсида кучли қор ёғиши сабаб бир нечта авиарейслар муқобил аэродромларга йўналтирилди
Наманган йўналишидаги айрим рейслар Тошкент, Самарқанд ва Ўш аэропортларига қўндирилди.
Фарғона водийсида кузатилган кучли қор ёғиши сабабли бир нечта авиарейслар муқобил аэродромларга йўналтирилди, дея хабар бермоқда “Ўзбекистон аэропортлари” АЖ матбуот хизмати.
Маълум қилинишича, ноқулай об-ҳаво шароити туфайли айрим рейслар экипажлари хавфсизлик чораларини инобатга олиб, захира аэродромларга қўниш ҳақида қарор қабул қилган.
Хусусан:
- Иркутск – Андижон йўналишидаги S7 Airlines авиакомпаниясининг S76311 рейси Ўш шаҳридаги муқобил аэродромга йўналтирилиб, маҳаллий вақт билан 00:01 да қўнган;
- Жидда – Наманган йўналишидаги Air Samarkand авиакомпаниясининг 9S5010 рейси Самарқанд аэропортига, 00:27 да қўнган;
- Екатеринбург – Наманган йўналишидаги Урал Аирлинес авиакомпаниясининг U62963 рейси Самарқанддаги муқобил аэродромга, 00:40 да қўнган;
- Самара – Наманган йўналишидаги “Ўзбекистон ҳаво йўллари”нинг HY9806 рейси Тошкент аэропортига, 04:11 да қўнган;
- Медина – Наманган йўналишидаги FlyOne Asia авиакомпаниясининг 7Q4452 рейси Тошкентдаги муқобил аэродромга, 06:05 да қўнган.
Айни пайтда Наманган халқаро аэропорти одатий иш режимида фаолият юритмоқда.
