Ўзбекистон армияси Марказий Осиёда етакчи бўлди — жаҳон армиялари рейтинги эълон қилинди
Global Firepower Index–2026 рейтингида Ўзбекистон Қуролли Кучлари 145 та давлат орасида 5 поғонага юқорилаб, 53-ўринни эгаллади.
Ўзбекистон армияси жаҳон миқёсидаги ҳарбий кучлар рейтингида ўз ўрнини мустаҳкамлади. Мудофаа вазирлиги хабарига кўра, “Global Firepower” портали томонидан эълон қилинган Global Firepower Index–2026 рейтингида Ўзбекистон Қуролли Кучлари Марказий Осиё мамлакатлари орасида биринчи ўринни эгаллаган.
Рейтинг натижаларига кўра, Ўзбекистон ҳарбий салоҳияти бўйича дунёнинг 145 та давлати орасида 5 поғонага юқорилаб, 53-ўринга жойлашди. Бу кўрсаткич мамлакат мудофаа тизими ва қуролли кучларни модернизация қилиш борасида амалга оширилаётган ислоҳотлар самараси сифатида баҳоланмоқда.
Марказий Осиё давлатлари орасида рейтинг қуйидагича шаклланган: Қозоғистон — 58-ўрин, Туркманистон — 78-ўрин, Тожикистон — 100-ўрин, Қирғизистон эса 109-ўринни эгаллаган. Шу тариқа, Ўзбекистон минтақадаги энг кучли армия сифатида қайд этилган.
“Global Firepower Index–2026” рейтингида дунёнинг энг қудратли армияси сифатида АҚШ етакчилик қилмоқда. Иккинчи ўринни Россия, учинчи поғонани эса Хитой эгаллаган. Рейтинг ҳарбий техника, шахсий таркиб, молиявий имкониятлар ва логистика каби кўплаб омиллар асосида шакллантирилади.
