Илон Маск катта сиёсатга қайтмоқда
У 2026 йилги АҚШ оралиқ сайловларида республикачилар кампаниясини молиялаштиришга тайёр. У аллақачон Сенат номзодига 10 миллион доллар хайрия қилган.
Миллиардер Илон Маск 2026 йилда АҚШда бўлиб ўтадиган оралиқ сайловлар арафасида республикачиларнинг сиёсий кампаниясини молиявий қўллаб-қувватлашга тайёр. Бу ҳақда The Wall Street Journal нашри хабар берди.
Маълум қилинишича, дунёнинг энг бой одами аллақачон Республикачилар партиясидан Сенатга номзод бўлган сиёсатчига 10 миллион доллар миқдорида хайрия ажратган. Шунингдек, Маск ва АҚШ президенти Доналд Трамп ўртасида аввал таранглашган муносабатлар сўнгги пайтларда аста-секин юмшаб бораётгани қайд этилмоқда.
Нашр ёзишича, сўнгги ҳафталарда Маскнинг сиёсий жамоаси рақамли платформалар ва сиёсий коммуникация лойиҳалари устида ишлаш учун эҳтимолий пудратчилар билан учрашувлар ўтказган.
Эслатиб ўтамиз, Илон Маск 2024 йилги президентлик сайловлари жараёнида Доналд Трамп ва республикачиларни қўллаб-қувватлаш учун қарийб 300 миллион доллар сарфлаган ва АҚШдаги энг йирик сиёсий донор сифатида эътироф этилган. Кузатувчиларга кўра, ҳозирги яқинлашув прагматик иттифоқ бўлиб, у Маскка Оқ уй ва амалдаги маъмурият билан таъсир каналларини сақлаб қолиш имконини беради.
2025 йилда Маск АҚШ Ҳукумат Самарадорлиги Департаменти (DOGE) координатори ва махсус тайинланган ходим сифатида бепул фаолият юритган. У бир муддат Трампнинг яқин сиёсий доирасига кирган. Бироқ, кейинчалик томонлар ўртасидаги муносабатлар бизнес манфаатлари ва сиёсий келишмовчиликлар сабаб совуқлашган.
5 июнь куни Маск ва Трамп ижтимоий тармоқларда очиқ баҳсга киришган. Кейинчалик Маск президент ҳақидаги кескин баёнотларидан афсус билдирганини маълум қилган.
