НАТО парчаланмоқда — NYT
Европа етакчилари АҚШнинг янги ташқи сиёсати НАТО доирасидаги ўзаро ишончга путур етказаётганини таъкидламоқда.
The New York Times Давосда бўлиб ўтган Жаҳон иқтисодий форуми якунларига таяниб, АҚШ сиёсий йўналишидаги ўзгаришлар НАТОнинг келажагини хавф остига қўяётганини ёзди. Нашрга кўра, Вашингтоннинг сўнгги қарорлари Европа давлатлари орасида АҚШ энди минтақа хавфсизлигига етарли даражада содиқ эмас, деган хавотирларни кучайтирмоқда.
Қайд этилишича, АҚШ президенти Дональд Трампнинг Гренландия масаласидаги кескин позицияси ва Европа давлатларига нисбатан савдо божларини жорий этиш таҳдиди трансатлантик иттифоқни заифлаштириши мумкин. Европа етакчилари бу сиёсат НАТО доирасидаги ўзаро ишончга путур етказаётганини таъкидламоқда.
Шу билан бирга, экспертлар НАТОнинг эҳтимолий парчаланиши бирданига эмас, балки босқичма-босқич кечиши мумкинлигини қайд этмоқда. Айрим давлатлар АҚШга ҳарбий ва сиёсий жиҳатдан қарамликни қайта кўриб чиқиш ҳамда Европанинг стратегик мустақиллигини кучайтириш тарафдори бўлиб чиқмоқда.
Маълум қилинишича, Давосдаги музокаралар давомида Дональд Трамп ва НАТО бош котиби Марк Рютте Гренландия масаласида муросага келган. Натижада АҚШнинг айрим Европа давлатларига нисбатан божлар жорий этиш режалари бекор қилинган. Бироқ, NYT таъкидлашича, бу келишув НАТО атрофидаги чуқур сиёсий шубҳаларни тўлиқ бартараф эта олмаслиги мумкин.
