Қозоғистонда ижтимоий тармоқларга рўйхатдан ўтишда паспорт талаби жорий этилиши мумкин
Ушбу ташаббус болаларни зарарли контентдан ҳимоя қилишга қаратилган.
Қозоғистонда ижтимоий тармоқларда рўйхатдан ўтишда паспорт маълумотларидан фойдаланиш масаласи муҳокама қилинмоқда. Бу ҳақда Мажлис депутати Екатерина Смишляева Марказий коммуникациялар хизмати брифингида маълум қилдидеб хабар беради Tengrinews.
Унинг сўзларига кўра, ушбу ташаббус болаларни интернетдаги зарарли контентдан ҳимоя қилишга қаратилган чоралар қаторига киради. Депутат ижтимоий тармоқлардан фойдаланишни тўлиқ тақиқлаш режалаштирилмаётганини, балки “рақамли вояга етиш” тушунчаси доирасида айрим контентларга киришни чеклаш кўзда тутилаётганини таъкидлади.
Рўйхатдан ўтишда паспорт маълумотларидан фойдаланиш қўшимча ҳимоя воситаси бўлиши мумкин, бироқ бу усулнинг тўлиқ самарадорлиги кафолатланмайди. Смишляева ёшни аниқлашнинг оддий усуллари, хусусан туғилган санани кўрсатиш, кўпинча самарасиз эканини қайд этди.
Шу билан бирга, депутат йирик ижтимоий платформалар ҳозирнинг ўзида аккаунт хатти-ҳаракатларини таҳлил қилиш орқали фойдаланувчининг ёш тоифасини аниқлаш ва контентни мослаштириш механизмларидан фойдаланаётганини айтди.
Парламент аъзосининг фикрича, болаларни зарарли ахборотдан ҳимоя қилишда давлат тақиқлари эмас, балки рақамли платформаларнинг масъулияти муҳим роль ўйнаши лозим. Рақамли муҳитни тартибга солиш бўйича муҳокамалар ҳозирда давом этмоқда.
