Шимолий Орол денгизидаги сув ҳажми беш йил ичида 34 миллиард куб метрга етиши мумкин
Қозоғистон ва Ўзбекистон ҳамкорлиги натижасида денгиздаги сув захиралари деярли икки баробарга ошиши таҳмин қилинмоқда.
Шимолий Орол денгизидаги сув ҳажми келгуси беш йил ичида 34 миллиард куб метргача ошиши мумкин. Бу ҳақда Қозоғистон сув ресурслари ва ирригация вазири Нуржан Нуржигитов маълум қилди.
Вазирнинг таъкидлашича, Шимолий Орол денгизини сақлаб қолишга қаратилган асосий чора-тадбирларнинг тўлиқ амалга оширилиши яқин беш йил ичида сезиларли натижа бериши кутилмоқда. Хусусан, денгиздаги сув захиралари деярли икки баробарга ошиши мумкин.
Нуржигитовга кўра, 2025 йилда Қозоғистон ва Ўзбекистон трансчегаравий сув объектларини биргаликда бошқариш ва улардан оқилона фойдаланиш бўйича муҳим битимни имзолаган. Дипломатик саъй-ҳаракатлар ҳамда Сирдарё ҳавзасидаги сув омборларининг келишилган иш режими ҳатто кам сувли йилларда ҳам Шимолий Оролга барқарор сув оқимини таъминлаш имконини берган.
Натижада Шимолий Орол денгизининг сув ҳажми 2023 йил бошидаги 18,4 миллиард куб метрдан ҳозирги 23 миллиард куб метргача ошган.
“Шимолий Орол денгизини сақлаш лойиҳасининг иккинчи босқичи доирасида Кўкарал тўғонини қайта қуриш ва денгиз сатҳини Болтиқ тизими бўйича 44 метргача кўтариш режалаштирилган. Ушбу лойиҳа амалга оширилса, Шимолий Орол юзаси 3913 квадрат километргача, сув ҳажми эса 34 миллиард куб метргача етади. Денгизни бу даражагача тўлдириш учун тўрт-беш йил талаб этилади”, — деди вазир.
