АҚШ иммиграция ходими Миннеаполисда 37 ёшли эркакни отиб ўлдирди
Ҳодиса депортация бўйича рейд вақтида содир бўлган. Расмийлар отишма ўзини ҳимоя қилиш мақсадида амалга оширилганини билдирмоқда.
АҚШ Иммиграция ва божхона хизмати (ICE) ходимлари 24 январь куни Миннеаполис шаҳрида 37 ёшли эркакни отиб ўлдирди. CNN ва NPR хабарларига кўра, ҳодиса федерал ходимлар томонидан ўтказилаётган депортация операцияси вақтида юз берган.
АҚШ Ички хавфсизлик вазирлиги маълумотига кўра, эркак ҳуқуқ-тартибот ходимларига тўппонча билан яқинлашган. Дастлаб уни қуролсизлантиришга уринишган, бироқ у куч билан қаршилик кўрсатган. Шундан сўнг федерал ходим ўз ҳаёти ва атрофдагилар хавфсизлигини ҳимоя қилиш мақсадида ўқ узган.
Вазирлик ҳодиса жойидан 9 мм калибрли ярим автоматик тўппонча топилгани акс этган суратни ҳам эълон қилди. Маълум қилинишича, ҳалок бўлган шахс тан жароҳати етказиш билан боғлиқ иш бўйича қидирувда бўлган ва амалдаги яшаш рухсатномасига эга бўлмаган мигрант сифатида кўрсатилган. Бироқ Миннеаполис полицияси раҳбари Браян ЎХара унинг АҚШ фуқароси бўлиши ҳам эҳтимолдан холи эмаслигини айтди.
Ҳодиса жамоатчиликда кескин норозиликка сабаб бўлди. Миннесота штати губернатори Тим Уолтс федерал офицерлар ҳаракатини қоралаб, президент Доналд Трампдан депортация жараёнларида федерал кучлардан фойдаланишни тўхтатишни талаб қилди. Трамп эса, аксинча, ICE ходимларини қўллаб-қувватлаб, улар қуролланган шахсдан ўзини ҳимоя қилишга мажбур бўлганини таъкидлади.
