Истанбулда ўзбекистонлик аёлнинг бошсиз жасади ахлат контейнеридан топилди
Қотилликда гумонланганган икки нафар Ўзбекистон фуқароси Туркиядан Грузияга қочаётганда қўлга олинди.
Туркиянинг Истанбул шаҳри, Шишли туманида ахлат контейнеридан топилган бошсиз аёл жасади Ўзбекистон фуқаросига тегишли экани расман тасдиқланди. Ўзбекистон Республикасининг Истанбул шаҳридаги Бош консулхонаси мазкур воқеани чуқур қайғу билан қабул қилганини билдириб, расмий баёнот эълон қилди.
Маълум қилинишича, 2026 йил 24 январь куни соат 19:40 атрофида чиқиндилар орасидан буюм тўплаб юрган шахс контейнер ичида чойшабга ўралган жасадни кўриб, бу ҳақда ҳуқуқни муҳофаза қилувчи органларга хабар берган. Дастлабки кўрик жараёнида жасаднинг бош қисми мавжуд эмаслиги аниқланган.
Бош консулхона томонидан Туркия ҳуқуқ-тартибот идоралари, суд-тиббий экспертиза маркази ва прокуратура билан ҳамкорликда олиб борилган текширувлар натижасида марҳума 37 ёшли Ўзбекистон Республикаси фуқароси — Д.Ҳ. экани тасдиқланган.
Расмий маълумотга кўра, ушбу жиноят юзасидан Ўзбекистон Республикасининг икки нафар фуқароси қўлга олинган. Улар Туркиядан Грузияга авиарейс орқали қочишга уринган пайтда ушланган. Ҳозирда тергов-суриштирув ишлари давом этмоқда ва жараён Бош консулхона томонидан назоратга олинган.
Шунингдек, Бош консулхона дипломатлари марҳуманинг оила аъзолари билан алоқа ўрнатиб, уларга зарур консуллик-ҳуқуқий ёрдам кўрсатилаётганини маълум қилди. Консулхона марҳуманинг яқинларига чуқур ҳамдардлик билдириб, қўшимча маълумотлар фақат расмий манбалар орқали эълон қилинишини таъкидлади.
