Миллий педагогика университети дипломлари энди Европада ҳам тан олинади

 

Ўзбекистон таълим тизими халқаро майдонда ўзининг муносиб ўрнини эгаллаб бормоқда. Ўзбекистон Миллий педагогика университетининг Кимё ва Биология бакалавриат таълим йўналиши ҳамда ушбу фанлар бўйича магистратура мутахассисликлари нуфузли халқаро аккредитация агентлиги ASIIN (Германия) томонидан жорий йилнинг 16 январь куни аккредитациядан ўтказилди.

 

Мазкур таълим йўналишлари мамлакатимизда биринчилардан ASIIN аккредитациясини қўлга киритган бўлиб, университетнинг таълим стандартлари, ўқув жараёнининг методик таъминоти, профессор-ўқитувчилар салоҳияти ва олиб борилаётган илмий тадқиқотлар халқаро мезонларга тўлиқ мос келишини тасдиқлайди.

 

2030 йил 30 сентябргача амал қиладиган ушбу сертификатлар университет битирувчиларининг дипломлари эндиликда Европа ва бошқа ривожланган мамлакатларда тан олинишини билдиради. Шунингдек, кимё ва биология йўналишларида таҳсил олган кадрларнинг хорижий таълим муассасалари ва саноат корхоналарида фаолият юритишига замин яратади.

 

Қайд этиш керакки, ASIIN экспертлари томонидан берилган методик тавсиялар ва баҳолаш мезонлари ўқув жараёнининг янада модернизация қилинишига хизмат қилади. Европа ва бошқа минтақалардаги университетлар билан қўшма дастурлар, алмашинув дастурлари ва илмий лойиҳалар амалга оширилиши учун мустаҳкам асос яратади.

 

Ушбу ютуқ айнан педагогик олий таълим муассасалари бўйича республикада илк маротаба қайд этилгани билан алоҳида аҳамиятга эга. Бу Ўзбекистон таълим тизимининг халқаро стандартлар билан уйғунлашаётганининг ёрқин далилидир.

 

Эндиликда мазкур йўналишларнинг битирувчилари, хорижий университетларда магистратура ёки докторантурани давом эттириш, халқаро таълим муассасаларида ўқитувчи ёки илмий ходим сифатида фаолият олиб бориш, биология ва кимё саноати йўналишларида жаҳон меҳнат бозорига чиқиш, халқаро грант лойиҳаларида иштирок этиши мумкин.