Қор бўрони сабаб АҚШда 428 мингдан ортиқ одам электр таъминотисиз қолди
Сўнгги 100 йилдаги энг кучли бўронлардан бири деб баҳоланаётган офат сабаб минглаб авиарейслар бекор қилинди, бир қатор штатларда фавқулодда ҳолат эълон қилинди.
Кучли "Ферн" номли қор бўрони Қўшма Штатларнинг катта қисмини қамраб олди. ОАВ ва Deutsche Welle хабарларига кўра, ноқулай об-ҳаво 37 штатга таъсир кўрсатган. Оқибатда 428 мингдан ортиқ аҳоли электр таъминотисиз қолган, айрим манбаларда эса бу кўрсаткич 139 минг уй хўжалигини ташкил этгани қайд этилмоқда.
Қор бўрони сабаб авиақатнов тизимида жиддий узилишлар юзага келган. Охирги тўрт кун ичида 13–16 мингдан ортиқ авиарейслар бекор қилинган. Айниқса, Техас, Луизиана, Ню-Мексико каби жанубий штатлардан тортиб, Ўрта Ғарб ва Ўрта Атлантика минтақаларигача бўлган ҳудудлар кучли таъсир остида қолган.
Ҳозирга қадар камида 18–22 штатда фавқулодда ҳолат эълон қилинган. Метеорологлар қор ёғиши, муз ёмғири ва кучли шамоллар яқин кунларда ҳам давом этиши мумкинлигидан огоҳлантирмоқда. Мутахассислар янги электр узилишлари ва транспорт тизимида қўшимча муаммолар юзага келиши эҳтимолини истисно этмаяпти.
Нью-Йорк шаҳрида об-ҳаво шароити сабаб камида уч нафар инсон ҳалок бўлгани маълум қилинди. Шаҳар мери Зохран Мамданининг сўзларига кўра, мегаполиста 20–23 сантиметргача қор ёғган. Айни пайтда аҳоли супермаркетларда озиқ-овқат маҳсулотларини оммавий равишда заҳира қилмоқда, ҳокимият эса фуқароларни эҳтиёткор бўлишга чақирмоқда.
