Сурхондарёда Тожикистон фуқаросини тутқунликда ушлаган шахс ушланди

 

 

Давлат хавфсизлик хизмати ва Ички ишлар вазирлиги ҳамкорлигида ўтказилган тезкор тадбирлар давомида бир қатор оғир жиноятлар фош этилди. Хусусан, Андижон шаҳрида ва Олтинкўл туманида яшовчи 1995, 1998 ва 2002 йилларда туғилган уч нафар шахс ўзларини ҳуқуқни муҳофаза қилувчи орган ходимлари сифатида таништириб, 2004 йилда туғилган фуқаронинг 100 минг АҚШ доллари миқдоридаги криптоактивларини товламачилик йўли билан қўлга киритгани аниқланди. Улар жабрланувчига эвазига 160 минг АҚШ доллари миқдорида қалбаки пул берган. Тезкор тадбирда гумонланувчилар қўлга олиниб, уларга нисбатан Жиноят кодексининг 165 ва 176-моддалари билан жиноят иши қўзғатилди.

 

Сурхондарё вилоятида аниқланган ҳолатда эса Денов шаҳрида яшовчи, илгари судланган 1993 йилда туғилган шахс Тожикистон Республикаси фуқаросини ноқонуний равишда ушлаб тургани маълум бўлди. У танишига 11 минг АҚШ доллари берган ва пул қайтарилмагани сабабли гаров сифатида унинг шеригини тутқунликда сақлаб, турли қийноқларга солган. Натижада жабрланувчига оғир тан жароҳати етказилган. Гумонланувчига нисбатан жиноят иши қўзғатилиб, қамоқ эҳтиёт чораси қўлланилди.

 

Хоразм вилоятида ҳам “кўча ечими” билан шуғулланиб келган шахслар қўлга олинди. Урганч ва Хива шаҳарларида ҳамда Боғот туманида яшовчи 1991, 1996 ва 1997 йилларда туғилган уч нафар фуқаро ҳудудий зўравонлик ва жиноий ҳаракатларга алоқадор экани аниқланиб, уларга нисбатан Жиноят кодексининг 277-моддаси билан иш қўзғатилди ва қамоқ чораси белгиланди.

 

Шунингдек, Янгиариқ туманида қимор ўйинлари ташкил этган 1965 йилда туғилган шахснинг хонадонидан 32 миллион сўм пул ва ўйин карталари ашёвий далил сифатида олинди. Андижон вилояти Жалақудуқ туманида эса 20 килограммдан ортиқ марихуана сақлаган, илгари судланган 1950 йилда туғилган фуқаро фош этилди. Ҳуқуқ-тартибот идоралари бу каби салбий ҳолатларга нисбатан қатъий чоралар кўрилишини маълум қилди.