Тошкентдаги боғчада болани ухламагани учун урган тарбиячи ишдан олинди
Боғча маъмурияти мазкур ҳолат аниқлангач, тарбиячи билан меҳнат шартномаси бекор қилинганини билдирган.
Тошкент шаҳридаги хусусий боғчалардан бирида болага нисбатан зўравонлик қилган тарбиячи ишдан бўшатилди. Бу ҳақда «Миллар» кўрсатуви хабар берди. Воқеа Олмазор туманида жойлашган “Америсан Дайсаре” нодавлат мактабгача таълим ташкилотида содир бўлган.
Маълум қилинишича, ҳодиса жорий йилнинг 22 январь куни бўлган. Тарбиячи тушлик вақтида ухламаган бола билан қўпол муносабатда бўлиб, унга қўл кўтарган. Боғча маъмурияти мазкур ҳолат аниқлангач, тарбиячи билан меҳнат шартномаси бекор қилинганини билдирган.
Боланинг онаси сўзларига кўра, тарбиячи барча болалар турганидан кейин унинг фарзандига нисбатан зўравонлик қилган ва натижада боланинг бурни қонаган. “Боламни кийинтириб, юз-қўлини ювиб, ёнимга тушириб юборишганда мен боғчага келган эдим”, — дейди у.
Пойтахт Мактабгача ва мактаб таълими бошқармаси маълумотига кўра, ҳолат ҳозирда бошқарма томонидан ўрганилмоқда. Ўрганиш якунларига кўра, мазкур воқеа юзасидан қўшимча расмий маълумот тақдим этилиши билдирилган.
