U-23 Осиё Кубоги: Япония Хитойни йирик ҳисобда мағлуб этиб, чемпион бўлди
Саудия Арабистонида бўлиб ўтган мусобақа финалида “самурайлар” рақибига ҳеч қандай имконият қолдирмади.
Саудия Арабистонида 23 ёшгача бўлган футболчилар ўртасидаги Осиё кубоги ўз ниҳоясига етди. Мусобақанинг ҳал қилувчи финал баҳсида Япония ва Хитой ёшлар терма жамоалари ўзаро тўқнаш келди.
Учрашувда Япония терма жамоаси тўлиқ устунликка эришиб, 4:0 ҳисобида йирик ғалаба қозонди ва олтин медалларни қўлга киритди. Беллашув давомида “самурайлар”нинг тезкор ҳужумлари ва мустаҳкам ҳимояси ҳал қилувчи омил бўлди.
Япония жамоаси таркибида Косэй Огура дубль муаллифига айланди. Шунингдек, Юто Озеки ва Рюносуке Сато ҳам биттадан гол уриб, жамоа ғалабасига салмоқли ҳисса қўшди.
Маълумот ўрнида айтиш жоизки, Япония U-23 терма жамоаси ушбу натижа билан ўз тарихида учинчи бор Осиё чемпиони унвонини қўлга киритди.
