2029 йилги Ёшлар Осиё ўйинлари Ўзбекистонда ўтказилади
Президент Мирзиёев Осиё Олимпия кенгаши Бош ассамблеясида иштирок этди. Тадбир якунида Осиё Олимпия кенгаши президенти Шайх Жавъан ол Соний Ўзбекистон Миллий Олимпия қўмитасининг “Шон-шараф” ордени билан тақдирланди.
Ўзбекистон Президенти Шавкат Мирзиёев 26 январь куни Тошкент шаҳрида бўлиб ўтаётган Осиё Олимпия кенгашининг 46-Бош ассамблеясида иштирок этди.
Тадбирда етакчи халқаро ва минтақавий спорт ташкилотлари раҳбарлари ҳамда вакиллари қатнашди. Жумладан, Миллий олимпия қўмиталари ассоциациясининг биринчи вице-президенти, Қатар Олимпия қўмитаси президенти Шайх Жавъан бин Ҳамад Ол Соний, Бутунжаҳон антидопинг агентлиги президенти Витолд Банка, Халқаро гимнастика федерацияси президенти Моринари Ватанабе, Халқаро оғир атлетика федерацияси президенти Муҳаммад Жалуд, “Ворлд Бохинг” президенти Геннадий Головкин, Осиё Паралимпия қўмитаси президенти Мажид Рашид ва бошқа нуфузли меҳмонлар иштирок этди.
Шунингдек, тадбирда АҚШ Президентининг махсус вакили Паоло Замполли, Россия Федерацияси спорт вазири Михаил Дегтярёв, Саудия Арабистони спорт вазири Абдулазиз бин Туркий Ол Сауд, Қатар ёшлар ва спорт вазири Шайх Ҳамад бин Халифа Ол Соний ҳам қатнашди.
Давлат раҳбари ўз нутқида спорт бугунги мураккаб ва зиддиятли дунёда халқлар ўртасида мулоқот, ўзаро ишонч ва ҳамкорликни мустаҳкамловчи универсал восита эканини таъкидлади.
Президент Шавкат Мирзиёев Шайх Жавъан бин Ҳамад Ол Сонийни Осиё Олимпия кенгаши президенти этиб сайлангани билан қутлаб, унинг Осиё ва жаҳон спортини ривожлантиришга қўшаётган салмоқли ҳиссасини алоҳида эътироф этди.
Ўзбекистоннинг Осиё Олимпия кенгаши билан самарали ҳамкорлиги изчил ривожланаётгани қайд этилиб, Кенгаш Ижроия қўмитасининг 77-сессияси Тошкентда муваффақиятли ўтказилгани, мамлакатимиз вакилининг Марказий Осиё бўйича вице-президент этиб сайлангани ҳамда 2029 йилги Ёшлар Осиё ўйинлари Ўзбекистонда ўтказилиши белгилангани таъкидланди.
Давлатимиз раҳбари Янги Ўзбекистонда жисмоний тарбия ва спорт соҳасида амалга оширилаётган ислоҳотларга ҳам тўхталди. Уч босқичли “Президент Олимпиадаси”, замонавий спорт инфратузилмалари, жумладан Олимпия шаҳарчаси барпо этилгани, спортчиларни тайёрлаш тизими тубдан такомиллаштирилаётгани қайд этилди.
2024 йил Парижда бўлиб ўтган Олимпия ва Паралимпия ўйинларида Ўзбекистон спортчиларининг муваффақиятли иштироки, шунингдек, мамлакатда 15 миллиондан ортиқ аҳоли мунтазам спорт билан шуғулланаётгани алоҳида эътироф этилди.
Ассамблея доирасида халқаро ва Осиё спорт ташкилотлари Ўзбекистон миллий федерациялари билан 20 дан ортиқ ҳамкорлик битимларини имзолади. Хусусан, Бўстонлиқ туманида Акбар Жўраев номидаги оғир атлетика клуби ривожлантирилади, Минтақавий спорт курашлари академияси ташкил этилади, волейбол ва чим устида хоккей инфратузилмалари барпо этилади.
Ўзбекистоннинг ҳалол спорт тамойилларига содиқлиги ва допингга қарши қатъий позицияси яна бир бор тасдиқланди. Тошкентда Марказий Осиё антидопинг ташкилотлари йиғилиши ва халқаро форум ўтказилаётгани ушбу йўналишдаги муҳим қадам сифатида баҳоланди.
Тадбир якунида Шайх Жавъан бин Ҳамад Ол Соний олимпия ҳаракатини ривожлантиришдаги хизматлари учун Ўзбекистон Миллий Олимпия қўмитасининг «Шон-шараф» ордени билан тақдирланди.
