АҚШда кучли қор бўрони оқибатида камида етти киши ҳалок бўлди — СNN

 

Қўшма Штатларда қор ёғиши, кескин совуқ билан кечган кучли бўрон оқибатида камида етти киши ҳалок бўлди. Бу ҳақда СNN телеканали хабар берди. Табиий офат сабаб бир миллиондан ортиқ истеъмолчи электр таъминотисиз қолган, 24 штатда фавқулодда ҳолат эълон қилинган.

 

Бўрон мамлакатнинг шарқий ва жанубий ҳудудларига жиддий таъсир кўрсатди. Хусусан, Теннесси штатида 330 мингга яқин, Миссисипида 160 мингдан ортиқ ҳамда Луизианада қарийб 135 минг киши электрсиз қолган. Расмийларга кўра, узилишларга электр узатиш тармоқларининг музлаб қолиши сабаб бўлган.

 

Нью-Йорк шаҳар мери Зоҳран Мамдани аҳолига қор ёғиши давом этаётганини инобатга олиб, уйда қолишни тавсия қилди. Шаҳарнинг айрим ҳудудларида қор қалинлиги 23 сантиметргача етган.

 

Нью-Йоркдаги LaGuardia халқаро аэропорти ҳамда Пенсилваниядаги Lehigh Valley халқаро аэропорти вақтинча фаолиятини тўхтатган.

 

СNN маълумотига кўра, рекорд даражадаги совуқ ва оғир об-ҳаво шароити сабаб электр узилишлари бир неча кун давом этиши мумкин. Мамлакат сўнгги 100 йил ичидаги энг кучли муз бўронларидан бири сифатида баҳоланаётган Ферн бўронидан жиддий зарар кўрган. Ушбу бўрон оқибатлари 200 миллиондан ортиқ аҳолига таъсир кўрсатган.

 

Вазият «тарихий» дея баҳоланмоқда. Аҳоли зарур маҳсулотларни захиралашга киришган бўлиб, айниқса батареялар, консервалар ва гигиена воситаларига талаб ошган. Синоптиклар қор, бўрон ва музлайдиган ёмғир ой охиригача давом этишини прогноз қилмоқда.