АҚШдаги депортация марказларида сақланаётган ўзбекистонликлар ватанга қайтишда ёрдам сўради
Ўзбекистон элчихонаси дипломатлари Виржиниядаги вақтинча сақлаш марказларида бўлиб, фуқароларнинг ҳолатини ўрганди.
Ўзбекистоннинг АҚШдаги элчихонаси дипломатлари Виржиния штатида жойлашган «Kerolayn» ва «Farmvill» хорижий фуқароларни вақтинча сақлаш марказларига ташриф буюриб, ушбу муассасаларда сақланаётган Ўзбекистон фуқаролари билан учрашди. Бу ҳақда «Дунё» ахборот агентлиги хабар берди.
Учрашувлар давомида ватандошларнинг сақлаш шароитлари, соғлиги, умумий аҳволи, овқатланиши ҳамда маиший эҳтиёжлари ўрганилди. Шунингдек, уларга консуллик ва ҳуқуқий масалалар юзасидан зарур тушунтиришлар берилди.
Ўзбекистон фуқароларининг маълум қилишича, улар АҚШ ҳудудига ноқонуний кириб келгани сабабли ҳозирда депортация билан боғлиқ суд жараёнларида иштирок этмоқда. Шу муносабат билан ватандошлар Ўзбекистонга имкон қадар тезроқ қайтишда амалий ёрдам сўраб мурожаат қилган.
Элчихона вакиллари ўз ваколатлари доирасида фуқароларни ватанга қайтариш масалалари бўйича АҚШнинг тегишли идоралари билан музокаралар олиб бориш, шунингдек, зарур консуллик ҳужжатларини расмийлаштиришда амалий ёрдам кўрсатишга тайёр эканини билдирди.
Шу билан бирга, АҚШ иммиграция сиёсатидаги сўнгги ўзгаришларни инобатга олиб, хорижда бўлиб турган Ўзбекистон фуқароларига қабул қилувчи давлат қонунчилигига қатъий риоя қилиш, мамлакат ҳудудида қонуний асосда бўлиш ҳамда ноқонуний фаолиятдан тийилиш тавсия этилди.
