Эронда интернетга кириш бўйича барча чекловлар олиб ташланади
Интернетни барча шаҳарларда қайта тиклаш жараёни босқичма-босқич амалга оширилмоқда.
Эрон президенти Масъуд Пизишкиён тегишли идораларга интернет бозорини жонлантириш ҳамда жамоатчиликнинг халқаро интернетга тўлиқ киришини таъминлаш учун мавжуд барча чекловларни бекор қилиш бўйича топшириқ берган. Ҳозирда ушбу жараён босқичма-босқич амалга оширилмоқда. Бу ҳақда The News нашри хабар бермоқда.
“Президент халқаро интернетга эркин кириш жамият ва иқтисодиёт учун муҳим эканини таъкидлади. Шу сабабли чекловларни олиб ташлаш бўйича аниқ кўрсатмалар берилди”, — дейилади хабарда.
Эслатиб ўтамиз, Эронда ҳукуматга қарши намойишлар кучайганидан сўнг 8 январь куни интернетга кириш тўлиқ чекланган эди. Ушбу қарор мамлакат ичида ва халқаро майдонда кескин танқидларга сабаб бўлган.
Аввалроқ президентнинг ўғли ва маслаҳатчиси Юсуф Пизишкиён ҳам интернетни ўчириш норозиликни камайтирмаслиги, аксинча, ҳукумат ва халқ ўртасидаги ишонч тафовутини чуқурлаштиришини айтиб, чекловларни бекор қилишга чақирганди.
