Ички ишлар вазири ўринбосари Б.Абдуллаев ва республика профилактика бошлиғи Х.Қодиров ишдан олинди
Бозорлар ва гавжум ҳудудларда хавфсизликни таъминлашдаги сусткашлик кескин танқид қилинди.
Президент Шавкат Мирзиёев раислигида видеоселектор йиғилишида бозорлар ва гавжум ҳудудларда жамоат хавфсизлигини таъминлашдаги камчиликлар кескин танқид қилинди.
Йирик бозорлар ва аҳолиси гавжум жойларда жамоат хавфсизлигини таъминлаш бўйича Миллий гвардия, ички ишлар ҳамда фавқулодда вазиятлар идоралари ўртасидаги ҳамкорлик етарли эмаслиги қайд этилди.
Маълум қилинишича, ўтган йил давомида бозорлар ва парклар ҳудудида жами 87 та жиноят содир этилган, шунингдек, пойтахт бўйлаб 774 та ёнғин ҳолати қайд этилган.
Шу билан бирга, бозорлар фаолиятини рақамлаштириш жараёни жуда суст кечаётгани танқид қилинди. Ҳозирги кунга қадар фақат «Чорсу» ва «Фарҳод» бозорларида ситуацион марказлар ташкил этилган, холос.
Ички ишлар вазирининг ахборот технологиялари бўйича масъул ўринбосари Зоҳиржон Қурбонов тайинланганига икки йилдан ошганига қарамай, тизимни рақамлаштириш борасида ҳануз сезиларли ижобий натижалар мавжуд эмаслиги кўрсатиб ўтилди.
Йиғилишда ушбу ва бошқа тизимли муаммолар ҳамда камчиликлар, аввало, раҳбарларнинг масъулиятсизлиги ва лоқайдлиги оқибати экани алоҳида таъкидланди.
Мазкур ҳолатлар сабаб, масъул вазир ўринбосари Б.Абдуллаев ҳамда республика профилактика бошқармаси бошлиғи Х.Қодиров эгаллаб турган лавозимларидан озод этилди.
