Францияда давлат хизматчиларига Google Meet, Zoom ва Teams’дан фойдаланиш тақиқланмоқда
Эндиликда барча давлат хизматчилари Франциянинг ўзида ишлаб чиқилган Visio тизимидан фойдаланиши шарт бўлади.
Франция ҳукумати давлат хизматчиларига тегишли ишлар учун АҚШга тегишли видеомулоқот платформаларидан — Google Meet, Zoom ва Microsoft Teams’дан фойдаланишни тақиқлашга қарор қилди. Бу ҳақда Politico нашри маълум қилди.
Қарор Европада давлат тузилмаларининг АҚШ технологияларига ҳаддан ташқари боғланиб қолаётгани борасидаги хавотирлар кучайиб бораётган бир пайтда қабул қилинди.
Бош вазир девони тайёрлаган расмий кўрсатмага кўра, эндиликда барча давлат хизматчилари Франциянинг ўзида ишлаб чиқилган Visio видеоконференция тизимидан фойдаланиши шарт бўлади. Ушбу платформа Ҳукуматнинг идоралараро рақамли бошқармаси (Dinum) томонидан яратилган бўлиб, Франциянинг Outscale компанияси инфратузилмасида ишлайди. Ҳужжат яқин кунларда расман эълон қилиниши кутилмоқда.
Давлат ислоҳоти вазири Давид Амиель якшанба куни Франция 2027 йилгача тўлиқ миллий видеомулоқот платформасига ўтишни мақсад қилганини билдирган эди. Аввалроқ, 2025 йил ёзида ҳам ҳукумат WhatsApp ва Telegram’дан фойдаланишни чеклаб, давлат хизматчиларини фақат Tchap номли махсус мессенжерга ўтказган эди.
Айни пайтда Visio тизимидан 40 мингга яқин ходим, жумладан аксарият вазирликлар ва Франция Миллий илмий тадқиқотлар маркази фойдаланмоқда. Dinum фойдаланувчилар сонини 250 минг нафарга етказишни режалаштирган. Шунингдек, идора ўтиш жараёнига риоя этилишини назорат қилади ва келгусида давлат интернет тармоғи орқали бошқа хорижий видеоплатформаларга киришни техник жиҳатдан чеклаши мумкин.
