Путин Сурия етакчисини ҳудудий яхлитликни тиклаётгани билан табриклади
Москвада ўтаётган Россия–Сурия учрашувида ўзаро ҳамкорлик ва ҳарбий масалалар муҳокама қилинмоқда.
Россия президенти Владимир Путин 28 январь куни Кремль саройида Сурия президенти Аҳмад аш-Шараа билан учрашув ўтказиб, уни мамлакат ҳудудий яхлитлигини тиклаш йўлидаги ижобий силжишлар билан табриклади. Путин Сурия ҳудудларини қайта бирлаштириш жараёни жадаллашаётганини қайд этиб, Россия ушбу йўналишда Дамашқни доимий қўллаб-қувватлаб келаётганини таъкидлади. Бу ҳақда A News хабар бермоқда.
“Биз Сурия ҳудудий яхлитлигини тиклаш бўйича олиб бораётган саъй-ҳаракатларингизни диққат билан кузатиб келмоқдамиз. Бу жараён тобора тезлашаётганини кўриб, сизни табрикламоқчиман”, деди Путин. У Россия Сурия суверенитети ва ҳудудий яхлитлигини тиклаш тарафдори эканини яна бир бор тасдиқлади.
Учрашувда икки мамлакат ўртасидаги иқтисодий ҳамкорлик масаласига ҳам тўхталиб ўтилди. Путин сўнгги вақтларда савдо-иқтисодий алоқалар “ўлик нуқтадан силжиганини” ва ўсиш қарийб 4 фоизни ташкил этганини айтди. Унинг сўзларига кўра, бу кўрсаткич кутилган даражада катта бўлмасада, ижобий тенденцияни сақлаб қолиш муҳим.
Шу куни Кремль матбуот котиби Дмитрий Песков Путин ва аш-Шараа Россия қуролли кучларининг Суриядаги мавжудлиги билан боғлиқ масалаларни ҳам муҳокама қилишини маълум қилди. Аҳмад аш-Шараанинг бу Москвага сўнгги тўрт ой ичидаги иккинчи ташрифи бўлиб, аввалги сафар 2025 йил октябрь ойида амалга оширилган эди.
