Трамп Си Цзиньпинни АҚШга кузги сафарга таклиф қилди

 

АҚШ президенти Доналд Трамп Хитой раиси Си Сзинпинни 2026-йил охирида, тахминан август ёки сентябрь ойларида АҚШга расмий ташриф билан келишга таклиф қилди. Бу ҳақда Вашингтоннинг Пекиндаги элчиси Дэвид Перду маълум қилди. Унинг сўзларига кўра, ушбу таклиф икки давлат ўртасидаги сиёсий ва иқтисодий мулоқотни янада мустаҳкамлашга қаратилган.

 

Элчи Перду Bloomberg агентлигига берган интервьюсида, Си Сзинпин ҳам жавобан Доналд Трампни апрел ойида Хитойга ташриф буюришга таклиф қилганини айтди. Томонлар ўртасидаги бу таклифлар олий даражадаги алоқалар фаоллашаётганидан далолат беради. Дипломатнинг таъкидлашича, сўнгги учрашувларда эришилган бир қатор келишувлар амалда бажарилмоқда.

 

Хусусан, фентанилга қарши кураш, соя маҳсулотлари савдоси ва ҳуқуқни муҳофаза қилиш органлари ўртасидаги ҳамкорликда сезиларли ижобий силжишлар кузатилган. Перду буни “прагматик ҳамкорликдаги реал тараққиёт” деб баҳолаб, икки мамлакат ўртасида ўзаро ишонч ва ҳурмат даражаси шаклланаётганини қайд этди.

 

Аввалроқ АҚШ молия вазири Скотт Бессент Трамп ва Си 2026-йил давомида турли халқаро майдонларда бир неча бор учрашиши мумкинлигини билдирган эди. Экспертлар фикрича, режалаштирилаётган ўзаро ташрифлар дунёнинг энг йирик икки иқтисодиёти ўртасидаги муносабатларни барқарорлаштириш ва янги келишувларга йўл очиши мумкин.