Эрон президенти норозилик намойишларида АҚШ, Исроил ва Европани айблади
Масъуд Пезешкиан ташқи кучлар мамлакатдаги иқтисодий инқироздан фойдаланиб, жамиятни беқарорлаштиришга уринганини айтди.
Эрон президенти Масъуд Пезешкиан АҚШ, Исроил ва Европа етакчиларини мамлакатдаги иқтисодий муаммолар фонида юзага келган норозилик намойишларини атайлаб қўзғатишда айблади. У бу ҳақда 31 январь куни давлат телевидениеси орқали қилган мурожаатида маълум қилди.
Президентнинг таъкидлашича, ташқи кучлар Эрондаги инфляция ва турмуш даражасининг пасайишидан фойдаланиб, жамиятни ичкаридан парчалашга ҳаракат қилган. Унинг сўзларига кўра, намойишчиларга турли ресурслар етказилган, айрим оддий фуқаролар эса бу жараёнга атайлаб жалб этилган.
“Доналд Трамп, Бенямин Нетаняху ва айрим европалик етакчилар бизнинг муаммоларимиздан фойдаланиб, одамларни кўчага олиб чиқишга, низолар ва нафрат уйғотишга уринди. Бу оддий ижтимоий норозилик эмас эди”, — деди Пезешкиан ва жараён мувофиқлаштирилган сиёсий ҳаракат бўлганини таъкидлади.
Маълумот ўрнида, 2025 йил охирида Эронда иқтисодий вазият кескинлашуви ортидан мамлакат бўйлаб кенг кўламли норозилик намойишлари бошланган эди. Ушбу воқеалар халқаро миқёсда ҳам кескин мунозараларга сабаб бўлиб, АҚШ ва Европа Иттифоқи Эрон расмийларига нисбатан янги босим чораларини муҳокама қилмоқда.
