Биринчи босқичнинг ўзидаёқ хонадонларнинг 82 фоизи рўйхатдан ўтди
Аҳолини онлайн рўйхатга олишда қарийб 30 миллион фуқаро иштирок этган.
31 январь соат 19:00 ҳолатига кўра, census.stat.uz портали орқали Ўзбекистонда жами хонадонларнинг 81,8 фоизида яшовчи 29,9 миллион нафардан ортиқ фуқаро онлайн рўйхатдан ўтган.
Бу кўрсаткич аҳолини рўйхатга олиш жараёнининг биринчи босқичи учун жуда юқори натижа сифатида баҳоланмоқда. Ушбу ютуққа эришишда Статистика қўмитаси томонидан тизимли ва қатъий чоралар кўрилган. Хусусан, жараён давомида кундалик брифинглар ўтказилган бўлиб, аҳолининг саволларига очиқ ва аниқ жавоблар берилди ҳамда онлайн рўйхатдан ўтиш тартиби кенг тушунтирилган.
Шунингдек, маҳаллий ҳокимликлар, ташкилот ва идоралар ҳам жараёнда фаол иштирок этиб, аҳолига амалий кўмак кўрсатган.
Онлайн рўйхатдан ўтишда иштирок этмаган фуқаролар учун тадбирнинг иккинчи босқичида “Маҳалла еттилиги” вакиллари уйма-уй юриб, маълумотларни планшет қурилмалари орқали census.stat.uz платформасига киритади.
