“Эпштейн иши”дан янги фактлар ошкор бўлди
ФҚБ томонидан ўтказилган сўроқ жараёнида гувоҳлардан бири Дональд Трамп рафиқаси Мелания билан айнан Жефри Эпштейн орқали танишганини маълум қилган.
АҚШ Федерал қидирув бюроси (ФҚБ) томонидан Жефри Эпштейн иши бўйича очиқланган ҳужжатлар асосида янги ва баҳсли маълумотлар ошкор бўлди. Ўтган ҳафта жамоатчиликка тақдим этилган материаллар ҳажми 3 миллиондан ортиқ ҳужжатни ташкил этган. Бу ҳақда El País нашри маълум қилди.
2019 йилда ФҚБ томонидан ўтказилган сўроқ жараёнида гувоҳлардан бири АҚШ президенти Дональд Трамп рафиқаси Мелания билан айнан Жефри Эпштейн орқали танишганини маълум қилган. Мазкур кўрсатма ҳужжатларда қайд этилган.
Шунингдек, ҳужжатларда Эпштейннинг 2014 йилда Украинада содир бўлган давлат тўнтаришидан кейин Rothschild Group бошқарув директори Ариан де Ротшильдга йўллаган хабари ҳам келтирилган. Унда Эпштейн Украинадаги беқарорликни «жуда катта имкониятлар» сифатида баҳолаган.
Орадан маълум вақт ўтгач, Rothschild Group Украина собиқ президенти Пётр Порошенкога тегишли бўлган Roshen ширинликлар компаниясини сотиб олгани ва Украинанинг энг йирик газ компанияси — «Нафтогаз»га молиявий хизматлар кўрсата бошлагани қайд этилган.
Ҳужжатларда, шунингдек, Эпштейн оролида зўравонликка учраган вояга етмаганлар орасида украиналик болалар сони кўп бўлгани ҳақидаги маълумотлар ҳам мавжуд.
Мазкур ошкор этилган фактлардан сўнг Польша ва Туркия расмийлари Эпштейн файлларида тилга олинган ўз фуқароларига нисбатан эҳтимолий зўравонлик ҳолатларини текшириш бўйича суриштирув ишларини бошлаган.
