Тошкент – Санкт-Петербург йўналишида автобус қатнови йўлга қўйилади
Қатновлар ҳафтада икки марта амалга оширилади.
2026 йил 23 февралдан бошлаб “Uzautotrans service” корхонаси Тошкент – Санкт-Петербург – Тошкент йўналишида мунтазам автобус қатновларини йўлга қўяди. Бу ҳақда Транспорт вазирлиги маълум қилди.
Маълум қилинишича, ушбу йўналиш бўйича рейслар ҳафтада икки маротаба — душанба ва жума кунлари амалга оширилади. Тошкентдан биринчи автобус 23 февраль куни соат 17:00 да «Тошкент» автовокзалидан жўнайди. Чипта нархи 1 200 000 сўм этиб белгиланган.
Йўл давомида автобус Москва шаҳридаги «Новоясеневская» автовокзалида оралиқ тўхташни амалга оширади ва ундан сўнг Санкт-Петербург автовокзалига етиб боради.
Санкт-Петербургдан Тошкентга қайтиш рейслари ҳам душанба ва жума кунлари бажарилади. Автобуслар Санкт-Петербург автовокзалидан маҳаллий вақт билан соат 17:00 да жўнайди.
