Эпштейн иши бўйича 6 миллион саҳифалик ҳужжатлар аниқланган

 

Вояга етмаганларни жинсий эксплуатация қилишда айбланган америкалик молиячи Жеффри Эпштейн иши бўйича ҳужжатларнинг тахминан ярми жамоатчиликка ошкор этилмаган. Бу ҳақда аёллар ҳуқуқлари бўйича адвокат, МсАллистер Оливариус юридик фирмаси асосчиси Энн Оливариус маълум қилди, деб хабар бермоқда The Guardian.

 

Унинг айтишича, АҚШ Адлия вазирлиги дастлаб Эпштейн иши доирасида 6 миллиондан ортиқ саҳифадан иборат материалларни аниқлаган, бироқ ҳозирга қадар уларнинг фақат ярми эълон қилинган. Вазирлик қолган ҳужжатлар такрорий, нотўғри ёки ҳуқуқий чекловлар сабаб тақдим этилмаганини билдирмоқда.

 

Ўтган ҳафта АҚШ Бош прокурори ўринбосари Тодд Бланш Эпштейн иши бўйича тахминан 6 миллион саҳифалик ҳужжатлар аниқланганини тасдиқлаб, бу “максимал шаффофликни таъминлаш” мақсадида турли манбалардан йиғилганини таъкидлади. Унинг сўзларига кўра, якуний тарзда эълон қилинган саҳифалар сони дастлаб тўпланган материаллардан анча кам.

 

Энн Оливариус Адлия вазирлиги баёнотларига шубҳа билан қарашини билдириб, ҳужжатларни айнан уларни сақлаётган томон баҳолаётгани суиистеъмол қилиш хавфини келтириб чиқаришини қайд этди.

 

Шунингдек, Марш Лав Фирм адвокати Женнифер Фриман ҳукуматнинг миллионлаб ҳужжатларни эълон қилмасдан қолдириши Эпштейн иши бўйича жавобгарликдан қочишга уриниш бўлиши мумкинлигини айтди. Унинг сўзларига кўра, жабрланувчилар номлари ошкор қилинаётган бир пайтда, айрим гумонланувчиларнинг исмлари яширилмоқда.

 

АҚШ конгрессмени Жейми Раскин эса эълон қилинган 3 миллион файлдан 10 мингдан ортиғи таҳрирланганини маълум қилиб, маълумотлар босқичма-босқич ва тўлиқ бўлмаган шаклда тақдим этилаётганини таъкидлади.

 

Адлия вазирлиги Эпштейн файлларини Президент Доналд Трамп томонидан имзоланган Эпштейн файллари шаффофлиги тўғрисидаги қонун (EFTA) асосида бир неча босқичда эълон қилган. Энг сўнгги ва кенг қамровли эълон 30 январь куни бўлиб, унда қарийб 2 мингта видео ва 180 мингдан ортиқ расм очиқланган.