Илон Маск дунёнинг энг бой одами сифатида рекорд ўрнатди
Унинг умумий бойлиги 852 миллиард долларга етган.
Forbes журнали маълумотларига кўра, америкалик тадбиркор Илон Маск инсоният тарихида соф бойлиги 800 миллиард доллардан ошган биринчи шахс бўлди. Унинг умумий бойлиги 852 миллиард долларга етган.
Маск бойлигининг кескин ошишига SpaceX компаниясининг сунъий интеллект йўналишидаги xAI компаниясини сотиб олиши сабаб бўлган. Нашрга кўра, мазкур битим тадбиркорнинг соф бойлигини бир йўла 84 миллиард долларга оширган.
Битимдан аввал Илон Маск SpaceX'нинг қарийб 42 фоизига, xAI'нинг эса 49 фоизига эгалик қилган. SpaceX 1 триллион долларга, xAI эса 250 миллиард долларга баҳоланган қўшилишдан сўнг Маск умумий қиймати 542 миллиард долларга тенг бўлган компаниянинг 43 фоиз улушини сақлаб қолди. Форбесънинг таъкидлашича, SpaceX ҳозирда Маскнинг энг қиммат активига айланган.
Бундан ташқари, Илон Маск Тesla компаниясининг 12 фоиз акцияларига (178 миллиард доллар) ҳамда 124 миллиард долларлик акция опционларига эга. Бу кўрсаткичлар уни бошқа миллиардерлардан кескин олдинга олиб чиқди.
Рейтингда иккинчи ўринни Google асосчиларидан бири Ларри Пейж эгаллаб турибди. Унинг соф бойлиги 281 миллиард долларга баҳоланмоқда, бу Маскдан қарийб 570 миллиард долларга кам.
The Economist нашрининг ёзишича, SpaceX ва xAI ўртасидаги «мега-бирлашув» иқтисодий жиҳатдан баҳсли ҳисобланади. Нашр xAI'нинг катта молиявий харажатлари, паст даромади ва қарздорлиги сабабли Маск SpaceX маблағлари орқали сунъий интеллект лойиҳасини субсидиялашга мажбур бўлаётганини қайд этади.
Шунингдек, Европа Иттифоқи ва Буюк Британияда Х ижтимоий тармоғи юзасидан олиб борилаётган терговлар SpaceX учун молиявий хавф туғдириши мумкин. Жарималар компания глобал даромадининг 6–10 фоизигача етиши эҳтимоли бор.
