Менда Эпштейн ҳужжатларини ўрганишга вақт йўқ — Трамп
АҚШ президенти Эпштейн иши бўйича эълон қилинган ҳужжатларни ҳали кўриб чиқмаганини, бунга давлат ишлари сабаб вақт етишмаслигини маълум қилди.
АҚШ президенти Доналд Трамп молиячи Жеффри Эпштейн иши бўйича эълон қилинган ҳужжатларни ҳали кўриб чиқмаганини маълум қилди. Бу ҳақда у СNN телеканалига берган интервьюсида айтиб ўтди.
Президентнинг таъкидлашича, ҳужжатлар билан танишишга вақти йўқ. “Менда жуда кўп вазифалар бор. Мен доим иш билан бандман”, — деди Трамп журналистларнинг саволларига жавобан.
Унинг сўзларига кўра, асосий эътибор мамлакатни бошқариш ва жамоатчиликни амалга оширилаётган ишлар ҳамда эришилаётган натижалар ҳақида хабардор қилишга қаратилган.
Шунингдек, Трамп жамиятда Эпштейн шахсига бўлган қизиқишнинг кескин ортганидан ҳайратда эканини билдирди. Унинг фикрича, молиячи тириклигида кенг жамоатчилик эътиборида бўлмаган, бироқ вафотидан сўнг унга бўлган қизиқиш кескин кучайган.
Эслатиб ўтамиз, 30 январь куни АҚШ Адлия вазирлиги болаларни жинсий эксплуатация қилиш ва зўравонликда айбланган Жеффри Эпштейн иши бўйича 3 миллиондан ортиқ ҳужжатни махфийликдан чиқарган эди. Мазкур материалларда Доналд Трамп ва унинг рафиқаси Мелания Трампнинг исмлари ҳам тилга олинган. Архивда, шунингдек, Эпштейннинг собиқ ёрдамчиси берган кўрсатмалар ҳам мавжуд.
