Хитой электромобилларда “кўринмас” эшик тутқичларини тақиқлади

 

Хитой электромобилларда яширин (электрон ёки «кўринмас») эшик тутқичларини қўллашни расман тақиқлаган биринчи давлат бўлди. Тегишли талаблар Хитой Саноат ва ахборот технологиялари вазирлиги томонидан эълон қилинди ва 2027 йил 1 январдан кучга kiradi.Bu ҳақда BBС хабар берди.

 

Қарор электр транспорт воситалари иштирокида юз берган бир қатор ҳалокатли йўл-транспорт ҳодисаларидан сўнг қабул қилинган. Хусусан, айрим аварияларда электр тизимидаги носозлик сабаб эшикларни очиш имкони бўлмагани қайд этилган. Шундан сўнг электромобиллар хавфсизлиги масаласи тартибга солувчи органлар томонидан кучайтирилган назоратга олинган.

 

Янги қоидаларга кўра, Хитой бозорида сотиладиган транспорт воситалари ичкаридан ҳам, ташқаридан ҳам механик усулда очиладиган эшик тизимига эга бўлиши шарт. Ҳар бир йўловчи эшигида ташқи томондан механик очиш механизмига киришни таъминловчи махсус чуқурча бўлиши талаб этилади. Шунингдек, салон ичида эшикни қўлда қандай очиш мумкинлигини кўрсатувчи аниқ белгилашлар ўрнатилиши лозим.

 

Ҳозирда тасдиқланган ва Хитой бозорига киришга тайёрланаётган автомобилларга эшик очиш механизмларини мослаштириш учун икки йиллик ўтиш даври берилади.

 

Маълумот учун, яширин электрон эшик тутқичлари илк бор 2012 йилда Tesla Model S автомобилида қўлланилган ва кейинчалик Хитой ишлаб чиқарувчилари орасида кенг тарқалган. China Daily нашрига кўра, Хитой бозорида энг кўп сотиладиган 100 та NEV моделининг қарийб 60 фоизи ана шундай тутқичлар билан жиҳозланган.