Трамп келгуси 3 йилда асосий эътиборини Марказий Осиёга қаратмоқчи
АҚШ президентининг махсус вакили Сержио Гор АҚШ узоқ вақт давомида бу минтақага етарлича эътибор бермаганини таъкидлади.
АҚШ президентининг махсус вакили, асли тошкентлик бўлган Сержио Гор Қўшма Штатлар келгуси уч йилдаги сиёсати Марказий Осиёга аҳамият қаратишини Қирғизистон пойтахти Бишкекда журналистлар билан бўлган учрашувда айтди.
Элчи Гор АҚШ узоқ вақт давомида бу минтақага етарлича эътибор бермаганини таъкидлади.
“Менда президент Трампнинг бевосита оддий кўрсатмаси бор - Қўшма Штатлар бу минтақа билан ишлашни хоҳлайди, Қўшма Штатлар бу минтақага устувор аҳамият беради ва биз маъмуриятимизнинг келгуси уч йилдаги сиёсатини айнан шу асосда қурмоқчимиз. Узоқ вақт давомида АҚШ бу минтақага етарлича эътибор бермади. Президент Трамп бошчилигида биз буни ўзгартирмоқчимиз“, — деган Гор.
Элчи АҚШ бу минтақадаги давлатлар билан технологиялар соҳасида ҳамкорлик қилмоқчи эканини айтди.
“Ўтган йили Оқ уйдаги С5+1 саммитида ҳамма гувоҳ бўлганидек, бу устуворлик Овал кабинетдан келиб чиқмоқда. Бу биз эътибор қаратадиган нарса, бу биз сиёсатимизни қурадиган нарса. Бу ҳар икки томон учун ҳам фойдали. Бизда энг яхши технологиялар бор, бизда энг яхши имкониятлар бор. Биз минтақа мамлакатлари ва ҳамкорлар билан ҳамкорликни айнан шу йўналишда қурмоқчимиз. Мен бугун форумда иштирок этаётган компаниялар рўйхатига қарадим ва адолатли равишда айтмоқчиманки, бу минтақага ташриф буюрган компанияларнинг энг узун ва аҳамиятли рўйхати. Биз келгуси ойлар ва йилларда шунга таянамиз. Бу фақат бошланиши”, — деган Элчи Сержио Гор.
