Ислом тараққиёт банки Ўзбекистонга 164 млн доллар маблағ ажратади

 

Ислом тараққиёт банки (IsDB) томонидан Ўзбекистон Республикасида инфратузилма ва таълим соҳаларини ривожлантириш мақсадида 164 миллион АҚШ доллари миқдорида молиявий маблағ ажратилиши белгиланди. Бу ҳақда IsDB матбуот хизмати хабар берди.

 

Мазкур молиялаштириш бўйича битимлар Саудия Арабистонининг Ал-Ула шаҳрида ўтказилаётган халқаро конференция доирасида имзоланди. Ҳужжатларга IsDB президенти Муҳаммад Ал-Жассир ҳамда Ўзбекистон Республикаси Бош вазири ўринбосари – иқтисодиёт ва молия вазири Жамшид Қўчқоров имзо чекди.

 

Келишувга кўра, ажратилаётган маблағларнинг 70 миллион АҚШ доллари Жиззах вилоятидаги Даштобод–Зомин–Бахмал–Ғаллаорол автомобиль йўлини реконструкция қилиш лойиҳасига йўналтирилади. Мазкур лойиҳа доирасида 143 километр ҳудудий йўллар ҳамда 30 километр маҳаллий йўлларни таъмирлаш режалаштирилган. Ушбу ишлар натижасида қарийб 200 минг нафар аҳоли учун транспорт хавфсизлиги ва ҳаракат қулайлиги сезиларли даражада яхшиланиши кутилмоқда.

 

Шунингдек, маблағларнинг 94,06 миллион АҚШ доллари SmartEd таълим лойиҳасини амалга оширишга йўналтирилади. Лойиҳа доирасида 58 та янги умумтаълим мактаби қурилиши ҳамда 2431 та замонавий ўқув синфи ташкил этилиши кўзда тутилган. Натижада ҳар йили 72 минг нафардан ортиқ ўқувчини сифатли таълим билан қамраб олиш имконияти яратилади.

 

Мазкур молиявий кўмак мамлакатда транспорт инфратузилмасини модернизация қилиш, таълим сифати ва қамровини кенгайтириш ҳамда ҳудудларнинг барқарор ижтимоий-иқтисодий ривожланишига хизмат қилиши таъкидланмоқда.