Навоийда сунъий интеллектга ихтисослашган синфлар очилиши режалаштирилмоқда
Янги ўқув йилидан “Бир мактаб – бир IT синф” тамойили асосида махсус таълим йўлга қўйилиши мумкин.
Президент Шавкат Мирзиёев 10 февраль куни Навоий вилоятини ижтимоий-иқтисодий ривожлантириш масалаларига бағишланган йиғилиш ўтказди. Унда ҳудуд таълим соҳасида республиканинг етакчи вилоятларидан бири экани алоҳида таъкидланди. Хусусан, олий таълим қамрови 71 фоизга етгани, ўтган йилда эса 10 та мактаб битирувчилари олийгоҳларга кириш бўйича 100 фоизлик натижа қайд этгани маълум қилинди.
Йиғилишда янги ўқув йилидан бошлаб Навоий ва Зарафшон шаҳарларида “Бир мактаб – бир IT синф” тамойили асосида сунъий интеллект ва IT йўналишларига ихтисослашган синфлар очиш таклиф қилинди. Ушбу ташаббус доирасида вилоятдан 100 нафар ўқитувчи пойтахтда ва хорижда IT ҳамда сунъий интеллект йўналишлари бўйича малака оширади.
Шунингдек, Тошкент ахборот технологиялари университетининг Зарафшон филиалида сунъий интеллект ва киберхавфсизлик бўйича кундузги таълим дастурини йўлга қўйиш режалаштирилмоқда.
Йиғилиш якунида президент ушбу таклифларни маъқуллаб, уларнинг амалий ижроси ҳудуд аҳолиси ҳаётида аниқ ва ижобий ўзгаришлар келтириши лозимлигини таъкидлади ҳамда масъулларга тегишли топшириқлар берди.
