Олмаотада 1 майгача ҳайдовчисиз такси хизмати ишга тушириш режалаштирилмоқда
Яндекс Казахстан билан ҳамкорликда 50 та ҳайдовчисиз автомобил босқичма-босқич йўлларга чиқарилади.
Баҳор фаслида Қозоғистоннинг Олмаота шаҳрида ҳайдовчисиз такси хизматини йўлга қўйиш режалаштирилмоқда. Казинформ хабарига кўра, лойиҳа Яндекс Kazakhstan компанияси билан ҳамкорликда амалга оширилади ва 2026-йил 1 майгача 50 та ҳайдовчисиз автомобилни йўлларга чиқариш кўзда тутилган.
Маълум қилинганича, лойиҳа доирасида нафақат Яндекс, балки бошқа технологик компаниялар ҳам жалб этилади. Шунингдек, inDrive такси хизмати билан ҳам ҳайдовчисиз транспортни ишга тушириш бўйича келишув имзоланган.
Дастлаб, ҳайдовчисиз автомобиллар махсус полигонда синовдан ўтказилади, сўнгра улар келишилган йўналишлар бўйича доимий назорат остида босқичма-босқич иш бошлайди. Йўналишлар ва хизмат кўрсатиш тартиби тажриба лойиҳаси давомида аниқлаштирилади.
Ҳозирча тажрибада фойдаланиладиган автомобиллар моделлари маълум қилинмаган. Хизмат нархлари эса бозор шароитлари, технология ва инфратузилма харажатларидан келиб чиқиб, хизмат кўрсатувчи компаниялар томонидан мустақил белгиланади.
