Россияда қурилиш майдонларидаги мигрантларнинг улуши 20 фоизгача камайди, уларнинг аксарияти ўзбеклар

 

Россия қурилиш соҳасида хорижий ишчи кучи улуши камайгани кузатилмоқда. Маълум қилинишича, сўнгги даврда қурилиш майдонларида чет эллик ишчилар улуши тахминан 20 фоизгача қисқарган. Ушбу маълумот Сибир қурилиш форумида Қурувчилар миллий ассоциацияси (НОСТРОЙ) президенти Антон Глушков томонидан тақдим этилган.

 

Мутахассиснинг таъкидлашича, ушбу тенденция бир неча омиллар билан изоҳланади. Хусусан, иммиграция қонунчилигининг қатъийлаштирилиши ҳамда қурилиш хизматларига бўлган талабнинг пасайиши хорижий ишчи кучи сонининг қисқаришига олиб келган. Натижада, Россия қурилиш секторида миллий ишчи кучининг улуши ошиб, ҳозирда асосий ишчи кучининг катта қисмини маҳаллий фуқаролар ташкил этмоқда.

 

Шу билан бирга, Россияда қурилиш соҳасида фаолият юритаётган хорижий ишчиларнинг асосий қисми анъанавий равишда Марказий Осиё давлатлари, жумладан Ўзбекистон ва Тожикистондан келади.

 

“Сўнгги йилларда мувозанат Ўзбекистон фойдасига ўзгарди. Бу мамлакатдан кўпроқ одамлар қурилиш майдонларида ишламоқда, Тожикистондан келган ишчилар сони эса камайди”, деб таъкидлади эксперт.

 

Шунингдек, Ҳиндистон ва Покистон фуқароларининг айрим соҳаларда, жумладан қишлоқ хўжалиги ва енгил саноатда пайдо бўлаётгани қайд этилмоқда. Келгусида ушбу ишчи кучи қурилиш секторига ҳам кириб келиши мумкинлиги айтилмоқда.

 

Мутахассислар илгари хорижий ишчилар улуши юқорироқ бўлганини, аммо ҳозирги вақтда айрим даврларга нисбатан 15–20 фоизга пасайиш кузатилганини қайд этмоқда.