Алексей Навальный қурбақа заҳри билан ўлдирилган
Лабораториялар биоматериалларда эпибатидин моддаси аниқлангани ҳақида хабар бермоқда.
Россиялик марҳум мухолифатчи Алексей Навальныйнинг оила аъзолари унинг вафотидан сўнг хорижга олиб чиқилган биоматериалларда эпибатидин моддаси аниқланганини маълум қилди. Биоматериалларни ўрганган бир нечта мустақил лаборатория экспертлари бир хил хулосага келган. Бу ҳақда The Insider нашри хабар берди.
Нашр маълумотига кўра, биоматериалларни текширган Буюк Британия, Швеция, Франция, Германия ва Нидерландия лабораториялари вакиллари бу борада Мюнхен хавфсизлик конференциясида қўшма баёнот беришни режалаштирмоқда.
Эпибатидин — 1974 йилда кашф этилган кучли нейротоксин бўлиб, дастлаб Жанубий Америкадаги Epipedobates tricolor турига мансуб дарахт қурбақаси терисидан ажратиб олинган. Кейинчалик у сунъий йўл билан ҳам синтез қилинган. Ушбу модда нерв тизимидаги рецепторларга таъсир қилиб, танада увишиш, фалажлик ва нафас олишнинг тўхташига олиб келиши мумкин.
“The Insider”га кўра, Навальныйда кузатилган аломатлар эпибатидиннинг маълум таъсирига мос келади. Уни даволаган реаниматолог шифокор Александр Полупан ҳам очиқ манбалардаги белгилар ушбу заҳар таъсирига мос келишини билдирган.
2025 йил сентябр ойида Юлия Навальная Навальный вафотидан сўнг унинг жамоаси биологик материал намуналарини қўлга киритиб, хорижий лабораторияларга юборганини маълум қилган эди. Лабораториялар мустақил равишда тадқиқот ўтказиб, заҳарланиш эҳтимолини тасдиқлаган.
Юлия Навальная ушбу ҳолат юзасидан кескин баёнот бериб, эрининг заҳарлангани бўйича далиллар мавжудлигини айтди ва айбдорлар жавобгарликка тортилиши кераклигини таъкидлади.
Эслатиб ўтамиз, Алексей Навальный 2024 йил 16 февраль куни Россиянинг Арктика ҳудудидаги колонияда вафот этган эди.
