Малайзияда ўзбекистонликларни шаҳвоний эксплуатацияга жалб этган жиноий гуруҳ ушланди
Гуруҳ Telegram орқали иш ваъдаси билан қизларни чет элга юбориб, уларни мажбурий меҳнат ва эксплуатацияга мажбур қилган.
Ички ишлар вазирлиги Тезкор қидирув департаменти томонидан Малайзиянинг Куала-Лумпур шаҳрида одам савдоси билан шуғулланган уюшган жиноий гуруҳ фаолиятига чек қўйилди. Бу ҳақда вазирлик ахборот хизмати маълум қилди.
Тергов маълумотларига кўра, 1971 йилда Тожикистонда туғилган аёл жиноий гуруҳга раҳбарлик қилган. У Ўзбекистондаги шериклари орқали Телеграмъда Куала-Лумпурдаги ресторанларда ишлаш таклифи билан эълонлар жойлаштириб, фуқароларни чет элга юборишни ташкил этган.
Гуруҳнинг Тошкентдаги аъзолари иш излаб мурожаат қилган фуқаролар билан учрашиб, уларни юқори маош, бепул яшаш жойи ва озиқ-овқат билан таъминлаш ваъдаси билан Малайзияга жўнатган. Аммо етиб боргач, қизлар шаҳвоний эксплуатацияга мажбур қилинган, йигитлар эса ваъда қилинган шароитлардан маҳрум этилиб, мажбурий меҳнатга жалб қилинган.
Шунингдек, жабрланувчиларнинг ишчи визалари расмийлаштирилмаган, маош тўланмаган ва паспортлари олиб қўйилган. Ҳозирга қадар ушбу жиноий гуруҳдан жабрланган камида саккиз нафар шахс аниқланган.
Мазкур ҳолат юзасидан Жиноят кодексининг 135-моддаси 2-қисми билан жиноят иши қўзғатилган. Ҳозирда тергов ҳаракатлари давом этмоқда.
