Наманганда МИБдан яширилган машина 7 соатда топилди
Фуқаро банкка гаров сифатида қўйган автомобилини бошқа одамга сотиб, уни яшириб қўйган. МИБ томонидан ўтказилган қидирувда у топилиб, жарима майдончасига жойлаштирилган.
Мажбурий ижро бюроси Наманган вилоят бошқармаси томонидан ўтказилган тезкор тадбир натижасида банк гаровида бўлган қора рангли JETOUR автомашинаси аниқланди.
Маълум бўлишича, фуқародан банк фойдасига 282 502 421 сўм миқдоридаги қарздорликни ундириш белгиланган.
Қарздор бир неча бор огоҳлантирилган бўлишига қарамасдан, қарзни ихтиёрий равишда тўламаган. Шундан сўнг ундирув гаровга қўйилган автотранспорт воситасига қаратилди. Олиб борилган ўрганишлар давомида JETOUR бошқа шахсга сотиб юборилгани маълум бўлди.
Транспорт воситаси бошқа хонадонга яшириб қўйилгани аниқланди. МИБ ходимлари томонидан қарийб 7 соат давом этган ижро ҳаракатлари натижасида гаровдаги, бозор қиймати 344 842 400 сўм бўлган автомашина топилди.
Автомашина белгиланган тартибда жарима майдонига жойлаштирилди.
