Ўзбекистондаги 1700 дан ортиқ масжидда Рамазонда “Хатми Қуръон” ўтказилади
“Хатми Қуръон” тадбирларига 3 642 нафар қори жалб қилинган.
Дин ишлари бўйича қўмита, Ўзбекистон мусулмонлари идораси ҳамда тегишли вазирлик ва идоралар томонидан Ўзбекистонда жорий йилги Рамазон ойига барча ташкилий чора-тадбирлар кўрилди.
Қайд этилишича, Рамазон ойини диний ва миллий қадриятларга уйғун ҳолда ўтказиш учун барча ташкилий шароитлар яратилди. Жорий йил 16-февраль куни “Муборак Рамазон ойини муносиб тарзда ўтказиш тўғрисида”ги қарор қабул қилиниб, унинг асосида “Рамазон – меҳр-мурувват, аҳиллик ва шукроналик ойи” эзгу ғояси доирасида амалга ошириладиган вазифалар белгиланди.
Маълумотларга кўра, республикада фаолият юритаётган 2 148 та масжиднинг 2 101 тасида таровеҳ намозлари адо этилади. Шундан 1 762 та масжидда “Хатми Қуръон” тадбирлари ташкил этилади. Ушбу жараёнларга 3 642 нафар малакали қори жалб этилган.
Шунингдек, сўнгги йилларда шаклланган ижобий тажрибадан келиб чиқиб, “Хатми Қуръон” тадбирлари барча масжидларда бир вақтда бошланиб, Рамазон ойининг 27-кечаси — Лайлатул Қадр кечасида якунланиши режалаштирилган.
Таровеҳ тадбирларини тартибли ва хавфсиз ўтказиш мақсадида ички ишлар органлари, Миллий гвардия, ёнғин хавфсизлиги хизматлари ҳамда 2 104 та махсус техника жалб этилади.
