Фарғонада 9-синф ўқувчиси профилактика инспекторини пичоқлади
Гумондор бувисининг чақирувига асосан борган профилактика инспектори билан ўзаро тортишиб қолган.
Бош прокуратура матбуот котиби Ҳаёт Шамсутдиновнинг Zamon.uz'гa маълум қилишича, жорий йил 18 февраль куни соат 11:50 ларда Қўқон шаҳар прокуратурасига шаҳар ИИБ навбатчилик қисмидан профилактика инспекторига тан жароҳати етказилгани ҳақида хабар келиб тушган.
Дастлабки маълумотларга кўра, Қўқон шаҳри «Садоқат» МФЙ, Бирлик кўчасида яшовчи, 2010 йилда туғилган вояга етмаган фуқаро ўз яшаш хонадонига ўзининг бувиси чақирувига асосан борган профилактика инспектори билан ошхонада ўзаро тортишиб қолган.
Аниқланишича, юзага келган келишмовчилик давомида вояга етмаган шахс профилактика инспектори орқа томони билан турган ҳолатдан фойдаланиб, стол устида бўлган ошхона пичоғи билан унинг кўкрак қафасининг орқа чап қисмига бир маротаба зарба бериб, тан жароҳати етказган.
Тиббий муассаса томонидан берилган дастлабки хулосага кўра, жабрланувчига “кўкрак қафасининг чап орқа соҳаси санчилган-кесилган, плевра бўшлиғига кириб борган жароҳат, чап томонлама гемопневмоторакс, ташқи ва ички қон кетиш” ташхиси қўйилган.
Мазкур ҳолат юзасидан 2026 йил 18 февраль куни вояга етмаган шахсга нисбатан Ўзбекистон Республикаси Жиноят кодексининг 104-моддаси 2-қисми «б» банди билан жиноят иши қўзғатилиб, Жиноят-процессуал кодексининг 221-моддаси тартибида ушланган.
