Россия ва Эрон Трамп таҳдидлари фонида Ҳурмуз бўғозида қўшма ҳарбий машғулот ўтказди

Эрон ва АҚШ муносабатлари таранглашаётган вақтда бугун, 19 февраль куни Бандар Аббос соҳили яқинида, Ҳурмуз бўғозига туташ ҳудудда Эрон ва Россия ҳарбий машғулот ўтказди.

 

Душанба куни эса Эрон қуролли кучларининг мафкуравий қаноти ҳисобланган Ислом инқилоби қўриқчилари корпуси (ИРГС) стратегик аҳамиятга эга Ҳурмуз бўғозида машғулотлар бошлади. Бу минтақада жойлаштирилган АҚШ ҳарбий-денгиз кучларига очиқ сигнал сифатида баҳоланмоқда.

 

Машғулотларнинг асосий мақсади — денгиз хавфсизлигини мустаҳкамлаш ва икки давлат флотлари ўртасидаги ҳамкорликни чуқурлаштириш. Машғулотлар қанча давом этиши бўйича аниқ маълумотлар берилмади.

 

Бу ҳарбий машғулот сешанба куни Женевада Уммон воситачилигида ўтган музокараларнинг иккинчи босқичидан сўнг Эрон нисбатан ижобий кайфият билдирган бир пайтга тўғри келди.

 

Аввалги музокаралар 2025 йил июнь ойида Исроилнинг Эронга берган мисли кўрилмаган зарбасидан сўнг барбод бўлган эди. Бу ҳодиса 12 кунлик урушга сабаб бўлиб, унда АҚШ ҳам қисқа муддат иштирок этган.

 

АҚШ президенти Доналд Трамп минтақага катта ҳарбий-денгиз кучларини жойлаштирганини ва буни «армада» деб атаган.

 

Эрон расмийлари АҚШ билан кескинлик кучайган пайтларда бир неча бор Ҳурмуз бўғозини ёпиш билан таҳдид қилган, бироқ у ҳозиргача ҳеч қачон тўлиқ ёпилмаган.

 

Дунё бўйлаб нефть ва суюлтирилган газ ташувларининг муҳим йўлаги бўлган Ҳурмуз бўғози илгари ҳам бир неча бор турли ҳодисаларга саҳна бўлган ва АҚШ–Эрон музокаралари фонида босим кучайгани сабаб яна диққат марказига қайтди.

 

Сешанба куни Эрон мазкур бўғозда ўтказаётган машғулотлари вақтида “хавфсизлик сабабли” уни бир неча соатга қисман ёпишини эълон қилди.