Россия ва Украина ўртасидаги уруш бу йил ҳам тугамайди — ОАВ
Reuters манбаларига кўра, Москва музокаралардан санкцияларни юмшатиш учун фойдаланмоқда, тинчлик келишуви эса бу йил имконсиз.
Исмини ошкор қилмаслик шарти билан Reuters билан гаплашган беш нафар Европа разведка раҳбари Россия урушни якунлашни истамаётганини билдирган. Улардан тўрт нафари Москва АҚШ иштирокидаги музокаралардан санкцияларни юмшатиш ва бизнес келишувларини илгари суриш учун фойдаланаётганини айтган.
Бу ҳафта Женевада бўлиб ўтган сўнгги раунд ҳам кирган музокаралар “музокаралар театри”, — дея баҳолаган Европа разведкаси раҳбарларидан бири.
Реутерс ёзишича, бу баёнотлар Европа пойтахтлари ва Оқ уй ўртасида “қарашлардаги ҳайратланарли тафовут” мавжудлигини кўрсатади. Украина томонига кўра, Оқ уй АҚШ Конгрессидаги ноябрь ойидаги оралиқ сайловлардан олдин — июнь ойига қадар тинчлик келишувига эришишни истамоқда. АҚШ президенти Доналд Трумп эса Россия президенти Владимир Путин келишувга тайёрлигига ишонишини айтган.
“Россия тинчлик келишувига интилмаяпти. У ўзининг стратегик мақсадларига эришмоқчи — ва бу мақсадлар ўзгармаган”, — деган Европа разведкаси раҳбарларидан бири.
Уларнинг айтишича, бу мақсадлар қаторига Владимир Зеленскийни ҳокимиятдан четлатиш ва Украинани Россия билан Ғарб ўртасида “нейтрал буфер ҳудуд”га айлантириш киради.
Яна бир разведка раҳбарининг таъкидлашича, Россия тезкор тинчликка муҳтож эмас ва унинг иқтисодиёти “ҳалокат ёқасида эмас”.
