Жанубий Корея собиқ президенти умрбодга қамалди
У 2024 йилда ҳарбий ҳолат жорий этилиши билан боғлиқ иш бўйича айбдор деб топилди.
Жанубий Корея суди мамлакатнинг собиқ президенти Юн Сок Ёлни 2024 йил охирида ҳарбий ҳолат жорий этилиши билан боғлиқ ҳолатлар юзасидан давлат тўнтаришини уюштиришда айбдор деб топди ва унга нисбатан умрбод қамоқ жазоси тайинлади. Бу ҳақда Yonhap ахборот агентлиги хабар берди.
Маълум қилинишича, 2024 йил 3 декабрь куни кечқурун Юн Сок Ёл халққа мурожаат қилиб, Корея Республикасини Шимолий Корея таҳдидидан ҳимоя қилиш зарурлигини таъкидлаган ҳолда мамлакатда фавқулодда ҳарбий ҳолат эълон қилган.
Бироқ президентнинг нутқидан қарийб 150 дақиқа ўтиб, парламентнинг фавқулодда сессиясида депутатлар ҳарбий ҳолатни бекор қилиш бўйича овоз бериб, ушбу қарорни рад этган.
6 декабрь куни парламент томонидан президентга нисбатан импичмент эълон қилиш бўйича биринчи уриниш бошланган, аммо у муваффақиятсиз якунланган. Орадан бир ҳафта ўтиб, 14 декабрь куни ўтказилган иккинчи овоз бериш натижасида импичмент тасдиқланиб, Юн Сок Ёл лавозимидан четлаштирилган ва судга тортилган.
