АҚШнинг 13 штати Трампни судга берди
Бунга қайта тикланадиган энергия лойиҳалари учун ажратилган 1,2 миллиард долларлик молиялаштириш бекор қилингани сабаб бўлган.
АҚШнинг 13 та штати федерал ҳукуматнинг тоза энергия лойиҳалари учун ажратилган молиялаштиришни бекор қилиш қарори юзасидан Оқ уй маъмуриятига қарши судга мурожаат қилди. Бу ҳақда Калифорния губернатори матбуот хизмати маълум қилди дейди ТАСС.
Маълумотларга кўра, Калифорния бошчилигидаги штатлар коалицияси Конгресс томонидан тасдиқланган қайта тикланадиган энергия ва инфратузилма лойиҳалари учун мўлжалланган 1,2 миллиард долларлик маблағнинг бекор қилинганини ноқонуний деб ҳисобламоқда. Даъво аризасини Колорадо, Вашингтон, Коннектикут, Иллинойс, Мериленд, Массачусетс, Нью-Жерси, Нью-Йорк, Орегон, Род-Айленд, Вермонт ва Висконсин штатлари расмийлари ҳам қўллаб-қувватлаган.
Калифорния губернатори Гавин Невсом федерал ҳукуматнинг мазкур қарорини танқид қилиб, молиялаштиришни тўхтатиш юз минглаб иш ўринлари яратилишига таҳдид солиши ҳамда соғлиқни сақлаш соҳасида йилига миллиардлаб доллар миқдоридаги иқтисодий самарага салбий таъсир кўрсатиши мумкинлигини таъкидлади. Унинг сўзларига кўра, ушбу қарор мамлакатнинг тоза энергия соҳасидаги глобал рақобатбардошлигига ҳам путур етказади.
