Тошкентдаги меҳмонхонада ҳамкасбига шилқимлик қилган банкирга нега жиноий иш очилмади?
Ижтимоий тармоқларда муҳокама қилинаётган ҳолат юзасидан расмий изоҳ берилди.
Ижтимоий тармоқларда наманганлик банк ходимининг Тошкентдаги меҳмонхоналардан бирида аёл ҳамкасбига нисбатан содир этган хатти-ҳаракати ва суд томонидан тайинланган жазо турли талқинлар билан муҳокама қилинмоқда.
Муҳокамаларда гўёки эркакнинг ҳаракатларида жиноят аломатлари кўриниб турса-да, 5 сутка маъмурий қамоқ жазоси билан қутилиб қолганига алоҳида урғу берилмоқда.
Мазкур ҳолат юзасидан Тошкент шаҳар судлари расмий баёнот берди.
Аниқлик киритилишича, дастлаб мазкур маъмурий ҳуқуқбузарликка доир иш 2025 йилнинг 25 декабрь куни жиноят ишлари бўйича Чилонзор туман судида кўрилиб, ҳуқуқбузарнинг хатти-ҳаракатларида жинсий эркинликка қарши жиноят аломатларига аниқлик киритиш ва жиноят иши қўзғатиш масаласини муҳокама қилиш учун иш материаллари суднинг ажрими билан туман прокуратурасига юборилган.
Такрорий суриштирувларда жиноят аломатлари тасдиғини топмагани боис иш материаллари МЖтКнинг 41-1-моддаси (шаҳвоний шилқимлик қилиш) билан судга юборилган ва суд қарори билан ҳуқуқбузарга нисбатан ушбу модда санкциясида кўрсатилган энг юқори жазо тайинланган.
