Янги Тошкентда “Бойлар шаҳарчаси” қурилаётгани айтилмоқда
Ҳар бир дона вилласи 2-3 млн доллар атрофида бўладиган уйлар юзасидан изоҳ берилди.
Ижтимоий тармоқларда Янги Тошкент ҳудудида 2030 йилг бориб топширилиши кутилаётган мега лойиҳада одатий квартирадан тортиб ҳар бир дона вилласи 2-3 млн доллар атрофида бўладиган бойлар шаҳарчаси ҳам барпо этилаётгани ҳақида хабарлар тарқалмоқда.
Бунга Янги Тошкент дирекцияси матбуот хизмати муносабат билдириб, ушбу хабарлар асосланмаган ва нотўғри эканини маълум қилди.
Қайд этилишича, Янги Тошкент лойиҳасида ҳеч қандай бойлар шаҳарчаси кўзда тутилмаган. Шаҳар қурилишининг биринчи босқич макетида мавжуд коттежлар келгусида хорижий мамлакатларнинг Ўзбекистондаги фавқулодда ва мухтор элчилари ҳамда халқаро ташкилот вакилларининг турар жойи бўлиши кўзда тутилмоқда.
Маълумот учун, Бугунги кунда биринчи босқич, 6 минг гектар ҳудудда қурилиш ишлари жадал олиб борилмоқда. 2033 йилгача 600 минг аҳоли учун замонавий инфратузилма барпо этилиши белгиланган. Лойиҳа тўлиқ якунланганда эса Янги Тошкент 2 миллион одам яшайдиган мегаполисга айланади.
