Исроил армиясини юқори жанговар шайлик ҳолатига келтирди
Бунга АҚШнинг Эронга зарба бериш эҳтимоли сабаб бўлган.
Исроил армияси (ЦАХАЛ) вакили Эфи Дефрин ўз баёнотида ҳарбийлар минтақадаги вазиятни диққат билан кузатаётганини маълум қилди. Унинг сўзларига кўра, операцион вазиятдаги ҳар қандай ўзгаришга тезкор жавоб беришга тайёргарлик кўрилган. Дефрин, шунингдек, фуқароларни фақат расмий манбаларга ишонишга чақирган.
Аввалроқ оммавий ахборот воситалари АҚШ “тез орада” Эронга зарба бериши мумкинлиги ҳақида хабар тарқатган эди. Шу фонда Исроил ички фронт қўмондонлигига юқори даражада шайлик ҳолатига ўтиш буюрилгани айтилмоқда.
Исроилнинг 12-канали маълумотига кўра, агар АҚШ Эронга ҳужум қилса, Исроил ҳам ҳарбий ҳаракатларга қўшилиши мумкин.
Бир қатор нашрлар томонидан эълон қилинган хабарларда АҚШ президенти Доналд Трамп Эронга кенг кўламли зарба бериш ёки бермаслик масаласида қарор қабул қилиш арафасида экани айтилмоқда. Дипломатик йўллар торайиб бораётган бир пайтда ҳарбий вариантлар ҳам кўриб чиқилаётгани таъкидланмоқда.
